twitterviber whatsapp telegramfacebookyoutube instagram
5th April 2025

އޮޅުނީއެއް ނޫން، ބޭނުންވީ ކޮރަލްސްގެ އަގުވަޒަން ކުރަން: މެންބަރު މުހައްމަދު

އަބްދުލް ވާހިދު ޙަސަން
Apr 4, 2025
1

އަންހެނުން ތަރައްގީއަށް މަސައްކަތްކުރާ ކޮމެޓީގެ ފަރާތުން ބޭއްވި 'ކަނބަލުންގެ މަސްރޭސް' ގެ އިންތިޒާމުތައް ހަމަޖެއްސިކަމުގެ ޝަރަފު ކުލަބު ކޮރަލްސްއިން ހޯދިކަން ފާހަގަކުރީ އެއްވެސްކަމެއް އޮޅިގެން ނުވަތަ އޮޅުވާލުމުގެ ނިޔަތެއް އޮވެގެން ނޫންކަމުގައި ކުޅުދުއްފުށީ އުތުރު ދާއިރާގެ މަޖިލިސް މެންބަރު މުހައްމަދު ދާއޫދު ވިދާޅުވެއްޖެ އެވެ.

'ފަރިއުތުރު ކޮރަލްސް މަސްރޭސް' ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން މެންބަރު މުހައްމަދު ވިދާޅުވީ، ކަނބަލުންގެ މަސްރޭސްގެ އިންތިޒާމުތައްވެސް ހަމަޖެއްސީ ކުލަބު ކޮރަލްސް ކަމަށެވެ. އެކަމާ ގުޅިގެން ވަކި މީހެއްގެ ނަން ހާމަނުކޮށް އަންހެނުން ކޮމެޓީގެ ރައީސާ ހަދީޖާ މޫސާ ވަނީ އެއީ ހަގީގަތާ ހިލާފުވާއެއްކަމަށް ވިދާޅުވެ އަންހެނުންގެ ކޮމެޓީގެ ފޭސްބުކް ޕޭޖް މެދުވެރިކޮށް ބަޔާނެއް ނެރެފަ އެވެ.

އެ ބަޔާނުގައި ރައީސާ ހަދީޖާ ވިދާޅުވެފައިވަނީ، މިއަހަރުގެ ފިތުރު އީދުދުވަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން ބޭއްވުނު "ކަނބަލުންގެ މަސްރޭސް 2025" އަކީ އަޅުގަނޑުމެން ކޮމިޓީގެ ފަރާތުން އިންތިޒާމުކޮށްގެން ބޭއްވުނު އިވެންޓެއްކަން އެންމެހައި ރައްޔިތުންގެ މައުލޫމާތަށްޓަކާ ހާމަކުރާ ކަމަށެވެ.

އަދި އެ އިވެންޓް ހިންގުމުގެ މަސައްކަތް ހަވާލުކުރެވިފައިވާ ބިޑް ކާމިޔާބުކުރީ "ޑީޕް ފިއުޝަން" ނަމަކަށް ކިޔާ ކުންފުންޏާ ކަމަށެވެ. އަދި އެ އިވެންޓް އިންތިޒާމުކޮށްފައިވަނީ ކޮރަލް ޖަމްޢިއްޔާއިން ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކަކީ ހަގީގަތާ ހިލާފު ވާހަކަތަކެއްކަމަށް ހަދީޖާ ވިދާޅުވި އެވެ.

މިމައްސަލަ ހޫނުވެފައިވަނިކޮށް މެންބަރު މުހައްމަދު ދާއޫދު ސޯޝަލް މީޑީއާގައި ބުރާސްފަތިދުވަހުގެ ރޭ ކުރެއްވި ޕޯސްޓެއްގައި ވިދާޅުވީ، އެހެން ވިދާޅުވީ، އޮޅިގެން ނުވަތަ އޮޅުވާލުމުގެ ނިޔަތެއް އޮވެގެން ނޫންކަމުގަ އެވެ. ބޭނުންވީ މިދިޔަ މަހެއްހާ ދުވަހުގެ ތެރޭގައި ތަފާތުއެކި މުބާރާތްތައް އިންތިޒާމުކުރުމުގައި ކުލަބު ކޮރަލްސްގެ މެންބަރުން ކޮށްފައިވާ މަސައްކަތް ފާހަގަކޮށް އެކަމުގެ އަގުވަޒަންކުރުން ކަމުގަ އެވެ.

"މި އަހަރު ފިތުރު ޢީދު ދުވަހު ބޭއްވި ޑަބްލިއުޑީސީ ކަނބަލުންގެ މަސްރޭސް 2025 އަދި ފަރިއުތުރު ކޮރަލްސް މަސްރޭސް 1446 ގެ އިންތިޒާމުތައް ހަމަޖެއްސުމަށް ކްލަބް ކޮރަލްސްގެ މެންބަރުން ކޮށްފައިވާ މަސައްކަތް ފާހަގަކޮށް އެކަމުގެ އަގުވަޒަންކުރުމުގެ ގޮތުން. މީގެ އިތުރުން ވެސް ފާއިތުވެ ދިޔަ މަސް ދުވަހުގެ ތެރޭގައި ކުލަބް ކޮރަލްސްގެ މެންބަރުން އެކި އެކި އުމުރު ފުރާތަކަށް އަމާޒުކޮށްގެން ހިންގާފައިވާ ހަރަކާތްތައް އަދި ކުލަބު އަލުން ދިރުވާ ވަރުގަދަކުރުމަށްޓަކައި ކޮށްފައިވާ ބުރަ މަސައްކަތް ފާހަގަކުރުމުގެ ގޮތުން." މެންބަރު މުހައްމަދު ވިދާޅުވި އެވެ.

މީގެ އިތުރުން މެންބަރުން މުހައްމަދު ވަނީ 'ފަރިއުތުރު ކޮރަލްސް މަސްރޭސް' ނިންމުމުގެ ހަރަކާތުގައިވެސް ފާހަގަކުރެއްވި ފަދައިން މިދިޔަ މަހެއްހާ ދުވަހުގެ ތެރޭގައި ކޮރަލްސް އިންތިޒާމުކުރި ގިނަ ހަރަކާތެއް ވިދާޅުވެފަ އެވެ. އެގޮތުން ޒުވާން އުމުރުފުރައަށް އަމާޒުކޮށް ބޭއްވި ޕީއެސް މުބާރާތާއި، ހަރު އުމުރު ފުރައިގެ ފަރާތްތަކަށް ބޭއްވި ކެރޮމް މުބާރާތާއި، އެކުލަބްގެ މެންބަރުންނަށް އަމާޒުކޮށްގެން ހިންގި ފުޓްސަލް މުބާރާތާއި، ކުޑަކުދިންނަށް އަމާޒުކޮށްގެން ހިންގި އޮޓޯމޯޓިވް މީޓްގެ މަސައްކަތް ފާހަގަކުރައްވާފަ އެވެ.

"އެއްމަސް ދުވަސް ތެރޭގައި އެކި އެކި އުމުރުފުރާތަކަށް އަދި ސެގްމެންޓްތަކަށް އަމާޒުކޮށްގެން ކުލަބެއްގެ މެންބަރުންތަކެއް ވަގުތު ހުސްކޮށް، ކޮށްފައިވަނީ ޝުކުރު ހައްގު ލާމަސީލު މަސައްކަތެއް. އިޖުތިމާއީ ގޮތުން ކުލަބު ތަކުން ކުރާ މިފަދަ މަސައްކަތްތައް ފާހަގަ ކުރުމަކީ ހަމަ ޔަޤީނުންވެސް އެ ފަރާތްތަކަށް ލިބޭނެ ހިތްވަރަކަށް ވާނެ." މެންބަރު މުހައްމަދު ވިދާޅުވި އެވެ.

Kulhudhuffushi Online
Hikifinifenmaage
Maalihaa Magu
H.Dh. Kulhudhuffushi
Tel: 6528355, 7978355