އޮސްޓްރޭލިއާގެ ތަފާތާއެކު ތުރުކީއަށް ސިހުން! ބޮޑު މޮޅެއް!

ވޯލްޑްކަޕެއްގައި އޮސްޓްރޭލިއާއަށް ލަނޑެއް ޖަހައިދިން އެންމެ ހަގު ކުޅުންތެރިޔާގެ ޝަރަފު ނެސްޓޮރީ އިރާންކުންޑާ ހޯދިއިރު ސޮކަރޫސްއިން ތުރުކީ ސިއްސުވާލައިފި އެވެ.

މެޗަށް ނުކުތްއިރު ވެސް މެޗުގެ ފޭވަރިޓެއްގެ ގޮތުގައި ގިނަ ބަޔަކަށް ބެލެވިފައި އޮތީ އާޑާ ގުލާއާއި ހަކަން ކަލަނާގުލޫއާއެކު މުބާރާތަށް ނުކުތް ތުރުކީ އެވެ. ނަމަވެސް މިއަދު ވޯލްޑްކަޕުގެ ގްރޫޕް ޑީގައި އޮސްޓްރޭލިއާއާ ތުރުކީ ބައްދަލުކުރި މެޗު އެންމެން ސިއްސުވާލާ ކާމިޔާބުކުރީ އޮސްޓްރޭލިއާއިންނެވެ.

ކެނެޑާގެ ވެންކޫވާގައި ރާއްޖެގަޑިން މިއަދު ހެނދުނު 9 ޖެހިއިރު ކުޅެވުނު މިމެޗުގައި ވަޓްފޯޑަށް ކުޅޭ ފޯވާޑް ނެސްޓޯރީ އިރާންކުންޑާ ފުރަތަމަ ހާފު ޖަހައިދިން ލަނޑާއެކު އޮސްޓްރޭލިއާއިން ލީޑު ނެގިއިރު ކޮނާރ މެޓްކާފްގެ ލަނޑާއެކު ޓޯނީ ޕޮޕޮވިޗްގެ އޮސްޓްރޭލިއާއިން ތުރުކީގެ މައްޗަށް ކުރިހޯދީ 2 - 0 ގެ ނަތީޖާއަކުންނެވެ.

20 އަހަރާއި 125 ދުވަހުގެ އިރާންކުންޑާ ވަނީ މިއަދު ޖެހި ލަނޑާއެކު ބްރެޓް ހޯލްމަންގެ ރެކޯޑް މުގުރާލާ އޮސްޓްރޭލިއާއަށް ވޯލްޑްކަޕެއްގައި ލަނޑު ޖަހައިދިން އެންމެ ހަގު ކުޅުންތެރިޔާގެ ޝަރަފު ހޯދާފަ އެވެ. ބްރެޓް ހޯލްމަން މިރެކޯޑް ހެދީ 26 އަހަރާއި 84 ދުވަހުގައި 2010 ވަނަ އަހަރު ވޯލްޑްކަޕުގައި ގާނާއާ ދެކޮޅަށް ޖެހި ލަނޑާއެކު އެވެ.

ކުރިން ބަޔާން މިއުނިކަށް ކުޅުނު އިރާންކުންޑާ އަކީ ވޯލްޑްކަޕުގައި 2018 ގައި އޮސްޓްރޭލިއާއާ ދެކޮޅަށް ކުޅުނު ފްރާންސް ޓީމަށްފަހު މުޅި މުބާރާތުގެ ވެސް އެންމެ ހަގު ޓީމުގައި ހިމެނި އަލަތު ވޯލްޑްކަޕުގައި ވާދަކުރާ ކުޅުންތެރިއެކެވެ. ތުރުކީ މެޗުގައި އިރާންކުންޑާގެ ފަރާތުން ފެނުނީ ރީތި އަދި މޮޅު ގޯލެކެވެ. މި ގޯލަކީ ޕައުލް އޮކޯން އެންގްސްޓްލާ ޖައްސާލި ބޯޅަ ހިފައިގެން ވަދެ ރީތިކޮށް ގޯލުގެ ތިރިއަށް އަމާޒުކޮށްލައިގެން ކާމިޔާބުކުރި ލަނޑެކެވެ.

2002 ވަނަ އަހަރަށްފަހު ތުރުކީން އަލަށް ވޯލްޑްކަޕެއްގައި ވާދަކުރިއިރު މެޗުގެ ބޮޑު ބައެއް ޑޮމިނޭޓް ވެސް ކުރީ އެޓީމުންނެވެ. އެހެންނަމަވެސް ނަތީޖާ ހަމަހަމަކޮށްލާނެ ރަނގަޅު ފުރުސަތެއް ލިބޭ ގޮތެއްނުވި އެވެ. ތުރުކީގެ ޑިފެންޑަރު އަބްދުލް ކަރީމް ބާޑަކްޝީ ދުރުން ގޯލާ އަމާޒުކޮށް ފޮނުވާލި ހަމަލާ ވެސް އޮސްޓްރޭލިއާގެ ކީޕަރު ޕެޓްރިކް ބީޗް ވަނީ ދިފާއުކޮށްފަ އެވެ. ވާދަވެރި މެޗެއްގައި އަލަށް މެޓް ރަޔަންގެ މަގާމުގައި ގިނަ ބަޔަކު ހައިރާންވެ ސުވާލު އުފެދިފައި ތިބި ދަނޑިވަޅެއްގައި ކުޅެން އެރި ބީޗް ވަނީ ޒެކީ ސެލިޗް ދެވަނަ ހާފުގައި ފޮނުވާލި ހަމަލާ އަދި ތުރުކީގެ ތަރި އާޑާ ގުލާގެ ހިލޭ ޖެހުން ވެސް މަތަކޮށްފަ އެވެ.

މި ގްރޫޕުގައި ދެން ހުރި މެޗުތަކަށް ބަލާއިރު އަންނަ ހުކުރު ދުވަހު އޮސްޓްރޭލިއާއިން ސިއޭޓަލްގައި ނުކުންނާނީ މުބާރާތް ބާއްވާ ގައުމު ޔުނައިޓެޑް ސްޓޭޓްސް އޮފް އެމެރިކާއާ ދެކޮޅަށެވެ. އެމެރިކާއިން ފުރަތަމަ މެޗުގައި ވަނީ ޕެރެގުއޭގެ މައްޗަށް 4 - 1 ގެ ބޮޑު މޮޅެއް ހޯދާފަ އެވެ. ސޭން ފްރާންސިސްކޯގައި ހޮނިހިރު ދުވަހު ތުރުކީން ނުކުންނާނީ ޕެރެގުއޭއާ ދެކޮޅަށެވެ. މިމެޗަކީ އެދެޓީމަށް ވެސް މޮޅެއް ހޯދަން މުހިންމު މެޗަކަށް ވެގެންދާނެ އެވެ.