މެސީއަށް އަމާޒުކޮށް އަމިއްލައަށް މަރުވުމުގެ ހަމަލާއެއް ދޭން އުޅުނު ސިއްރު ރޭވުން އެމެރިކާ ފުލުހުންގެ ރިޕޯޓުން ފަޅާ އަރައިފި!

ދުނިޔޭގެ ފުޓްބޯޅައިގެ އެންމެ ބޮޑު އީދުގެ ތެރެއިން، މުޅި ފުޓްބޯޅަ ދުނިޔެ ސިއްސުވާލާފަދަ ނުރައްކާތެރި އަދި ބިރުވެރި މަޢުލޫމާތުތަކެއް އެމެރިކާގެ ފުލުހުންގެ ޚާއްޞަ ސެކިއުރިޓީ ރިޕޯޓަކުން ހާމަވެއްޖެ އެވެ.

ސްޕެއިންގެ މަޝްހޫރު ނޫސް Informacion.es އާއި އިނގިރޭސިވިލާތުގެ The Mirror އަދި Daily Star އިން ތިލަކޮށްފައިވާ އެމެރިކާގެ ފުލުހުންގެ ސިއްރު ޑޮސިއޭއިން ދައްކާ ގޮތުގައި، މުބާރާތުގެ ތެރޭގައި އެންމެ ގިނައިން މަރުގެ އިންޒާރުތަކާއި ނުރައްކާތެރި ހަމަލާތަކުގެ އަމާޒަކަށް ވެގެންދިޔައީ އާޖެންޓީނާގެ ސުޕަސްޓާރު ލިއޮނެލް މެސީ އެވެ. މީގެ ތެރޭގައި އޭނާ މަރާލުމަށް އަމާޒުކޮށްގެން ދޭން ރޭވި އަމިއްލައަށް މަރުވުމުގެ (ޖާނުން ފިދާވުމުގެ) ނުރައްކާތެރި ހަމަލާއެއްގެ ރޭވުންވެސް ހިމެނެ އެވެ.

ޖޯޑަން މެޗުގެ ކުރިން ދިން ނުރައްކާތެރި އިންޒާރު

އާޖެންޓީނާއިން ގްރޫޕް ސްޓޭޖުގައި ޖޯޑަންއާ ދެކޮޅަށް ކުޅެން އޮތް މެޗުގެ ކުރިން، މީހަކު ވަނީ ޓެކްސަސްގެ ޑާލަސް އެއާޕޯޓަށް ގުޅައި ވަރަށް ބިރުވެރި އިންޒާރެއް ދީފަ އެވެ. ލީކުވެފައިވާ ފުލުހުންގެ ރިޕޯޓުގައިވާ ގޮތުން އެމީހާ އިންޒާރު ދިނީ:

"އަހަރެން އިތުރު ދެ މީހަކާއެކު އަމިއްލައަށް އުފައްދާފައިވާ ގޮވާތަކެއްޗާއި (homemade bombs) އަދި AR-15 މަރުކާގެ ބާރުގަދަ ބަންދު ހަތިޔާރެއް ހިފައިގެން ދަނޑަށް ވަންނާނަން."

އަދި އެމީހާ ވަނީ "ފުލުހުންނާއި ދެ ޓީމުގެ ކުޅުންތެރިންނަށް ހަމަލާދިނުމުގެ އިތުރުން ލިއޮނެލް މެސީއަށް ހާއްސަކޮށް އަމާޒުކުރާނެ" ކަމަށް ބުނެފަ އެވެ. މިއާއެކު މިނިޓްކޮޅެއްގެ ތެރޭގައި ސެކިއުރިޓީ އޮޕަރޭޝަންތައް ވަރުގަދަކޮށް، ރައްކާތެރިކަމުގެ ފިޔަވަޅުތައް އެންމެ މަތީ ދަރަޖައަށް މަތިކުރެވުނެވެ.

"ހަށިގަނޑުގައި 4 ބޮން ބަނދެގެން ދަނޑަށް ވަދެ މެސީ ގޮއްވާލާނަން"

އެންމެ ނުރައްކާތެރި އިންޒާރު ލިބިފައިވަނީ އެޓްލާންޓާގައި އާޖެންޓީނާއިން އީޖިޕްޓާ (Egypt) ދެކޮޅަށް ކުޅުނު މެޗުގެ ތެރޭގަ އެވެ. ސޯޝަލް މީޑިއާ އެކްސް (X) ގައި މީހަކު ވަނީ ވަރަށް ބިރުވެރި އިންޒާރެއް އާންމުކޮށްފަ އެވެ:

"އަހަރެން މި ދަނީ ހަށިގަނޑުގައި ހަތަރު ބޮން ބަނދެގެން އެޓްލާންޓާގެ ދަނޑަށް ވަދެ މެސީ ގޮއްވާލަން."

އެ މެޗުގެ ތެރޭގައި އިތުރު ފޯނު ކޯލެއް މެދުވެރިކޮށް ފުލުހުންނަށް އިންޒާރު ދިނީ ދަނޑުގެ ތެރޭގައި ހުރި ތިން ކުނިއަޅާ ވަށިގަނޑެއްގެ ތެރޭގައި ބޮންތަކެއް ހަރުކޮށްފައިވާނެ ކަމަށެވެ. އެއާއެކު އެމެރިކާގެ ސެކިއުރިޓީ އޮފިޝަލުން ވަނީ ގޮވާތަކެތި ހޯދާ ހާއްސަ ކުއްތާތައް (explosive-detection K-9 teams) ބޭނުންކޮށްގެން ދަނޑުގެ މުޅި ސަރަހައްދު ފާސްކޮށްފަ އެވެ. ނަމަވެސް ބަލައިފާސްކުރުމަށްފަހު އެއްވެސް ބޮމެއް ފެނިފައިނުވާތީ، އެއީ ދޮގު އިންޒާރެއް (false alarm) ކަން ވަނީ ކަށަވަރުވެފަ އެވެ.

ރޮނާލްޑޯ، އެމްބާޕޭ އަދި އެހެން ކުޅުންތެރިންނަށް ކުރިމަތިވި ނުރައްކާތައް

ފުލުހުންގެ ޑޮސިއޭއިން ހާމަވާ ގޮތުގައި، ހަމައެކަނި މެސީއެއް ނޫނެވެ. ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށްވެސް ވަނީ ބޮޑެތި ނުރައްކާތަކާ ކުރިމަތިލާންޖެހިފަ އެވެ. މީގެ ތެރޭގައި:
* ރޮނާލްޑޯއަށް ފާރަލުން: ހޫސްޓަން، ޓޮރޮންޓޯ އަދި މިއާމީގައި ރޮނާލްޑޯ ހުރި ހޮޓާތަކުގެ މައުލޫމާތު ހޯދަން އުޅުނު މީހުން ވަނީ ހިފަހައްޓާފަ އެވެ. މީގެ ތެރެއިން އެކަކު ވަނީ ރޮނާލްޑޯ ހުރި ހޮޓަލަށް ވަދެ، އޭނާއާއެކު ލިފްޓަށް އަރަން އުޅެނިކޮށް ހައްޔަރުކޮށްފަ އެވެ.
* ކިލިއަން އެމްބާޕޭ އަދި އެހެން ކުޅުންތެރިން: ފްރާންސްގެ އެމްބާޕޭއާއި، ނޯވޭގެ އަލެކްސަންޑާ ސޯލޯތު އަދި ކޮލަމްބިއާގެ ޖަމިންޓަން ކަމްޕާޒްއަށްވެސް ވަނީ މަރުގެ އިންޒާރުތައް ލިބިފަ އެވެ.

އެފްބީއައި (FBI) އާއި އިންޓަރނޭޝަނަލް ސެކިއުރިޓީގެ އަވަސް ފިޔަވަޅުތައް

މި ނުރައްކާތެރި ހާދިސާތައް އިންވެސްޓިގޭޓްކޮށް ބަލަހައްޓާފައިވަނީ އެމެރިކާގެ އެފްބީއައި (FBI) އާއި އިންޓަރނޭޝަނަލް ޕޮލިސް ކޯޕަރޭޝަން ސެންޓަރު (IPCC) ގުޅިގެންނެވެ. މުބާރާތުގައި ބައިވެރިވި ގައުމުތަކުގެ ސެކިއުރިޓީ އިދާރާތަކާ ގުޅިގެން ކުރެވުނު މަސައްކަތުން، އެއްވެސް ނުރައްކާތެރި ހާދިސާއެއް ނުހިނގައި މުބާރާތް ވަނީ ނިންމާލެވިފަ އެވެ.

ނަމަވެސް، ދުނިޔޭގެ އެންމެ މަގުބޫލު ކުޅުންތެރިންނަށް އަމާޒުކޮށް ދެވުނު މިފަދަ ނުރައްކާތެރި އިންޒާރުތަކަކީ ކުރިއަށް އޮތް ބައިނަލްއަގުވާމީ މުބާރާތްތަކުގައި ސެކިއުރިޓީ އިންތިޒާމުތައް އިތުރަށް ވަރުގަދަކުރަންޖެހޭނެކަން ސާބިތުކޮށްދިން ބިރުވެރި ހަގީގަތެކެވެ.