ރޮޑްރީ 65 މިލިއަން ފައުންޑަށް ބާސެލޯނާއަށް! މެންޗެސްޓާ ސިޓީއިން ބުއާދީއާއި އެންޒޯ ހޯދަން ބޮޑު ހަރަދަކަށް ތައްޔާރުވެއްޖެ – ޓްރާންސްފާ ބާޒާރުގެ އެންމެ ފަހުގެ ހޫނު ހަބަރު!

ޔޫރަޕްގެ ފުޓްބޯޅަ ޓްރާންސްފާ ވިންޑޯ ބަންދުވާން އެންމެ ފަހުގެ މަދު ދުވަސްކޮޅަކަށް ވެފައިވަނިކޮށް، ބޮޑެތި ކްލަބްތަކުން ކުޅުންތެރިން ހޯދުމުގެ ވާދަވެރިކަން މިވަނީ އިންތިހާއަށް ހޫނުވެފަ އެވެ. ބީބީސީ ސްޕޯޓްސްއިން ރިޕޯޓްކުރާ ގޮތުގައި، މި ދަނޑިވަޅުގައި އެންމެ ބޮޑު ހަލަބޮލިކަމެއް އުޅެނީ މެންޗެސްޓާ ސިޓީގެ މިޑްފީލްޑް ބަދަލުކުރުމުގެ ބޮޑު ރޭވުމުގަ އެވެ. އަދި ޗެލްސީގެ ޓްރާންސްފާ ހަރަކާތްތަކަށެވެ.

އެގޮތުން، ސިޓީގެ ކާމިޔާބު މިޑްފީލްޑަރު އަދި 2024 ވަނަ އަހަރުގެ ބެލޮންޑޯ ހާސިލްކުރި ރޮޑްރީ 65 މިލިއަން ފައުންޑުގެ އަގަކަށް ބާސެލޯނާއަށް ބަދަލުވުމުގެ އެއްބަސްވުމަކަށް އާދެވިފައިވާއިރު، އޭނާގެ ބަދަލުގައި ފްރާންސްގެ ލީލްއަށް ކުޅެމުންއަންނަ މޮރޮކޯގެ އުމުރުން 18 އަހަރުގެ މިޑްފީލްޑަރު އާޔޫބް ބުއާދީ ހޯދުމަށް ސިޓީއިން އަންނަނީ ކުރިއަރާފައިވާ މަޝްވަރާތަކެއް ކުރަމުންނެވެ.

ލީލްއިން ބުއާދީގެ އަގު 100 މިލިއަން އީޔޫރޯ (85.6 މިލިއަން ފައުންޑު) އަށް އަރުވާފައިވާއިރު، ސިޓީގެ ކޯޗު އެންޒޯ މަރެސްކާ އަންނަނީ ޗެލްސީގެ އެންޒޯ ފެނާންޑޭޒް ހޯދުމުގެ އުއްމީދުވެސް ދޫނުކޮށް މަސައްކަތް ކުރަމުންނެވެ. އެންޒޯ ހޯދަން ސިޓީއިން މަސައްކަތްކުރާނަމަ 120 މިލިއަން ފައުންޑަށް ވުރެ ބޮޑު އަގެއް ދައްކަންޖެހޭނެ އެވެ.

މީގެއިތުރުން، ޗެލްސީގެ ޕޯޗުގަލް ވިންގަރު ޕެޑްރޯ ނެޓޯ 100 މިލިއަން ފައުންޑާ ގާތްކުރާ އަގެއްގައި ވިއްކާލަން އެ ކްލަބުން ބޭނުންވާއިރު، ސައުދީގެ އަލް-ހިލާލްގެ އިތުރުން މެންޗެސްޓާ ސިޓީ، އާސެނަލް އަދި ޓޮޓެންހަމްއިން އަންނނީ އޭނާއަށް ފާރަލަމުންނެވެ. އަދި މެންޗެސްޓާ ޔުނައިޓެޑުން ބްރޫނޯ ފެނާންޑޭޒް ވިއްކާލަން ބޭނުންނުވި ނަމަވެސް، ތުރުކީގެ ގަލަތަސަރާއީއިން ވަނީ އަހަރަކު 18.3 މިލިއަން ޕައުންޑުގެ މުސާރައެއް (މިހާރު ލިބޭ މުސާރައިގެ ދެގުނަ) ހުށަހަޅައި އޭނާ ހޯދުމުގެ މަސައްކަތް ފަށާފަ އެވެ. އަދި ބާސެލޯނާއިން ވިއްކާލަން ނިންމާފައިވާ އުމުރުން 22 އަހަރުގެ ސްޕެއިން މިޑްފީލްޑަރު މާކް ކަސާޑޯގެ ސޮއި ހޯދުމުގެ ފުރުސަތުވެސް ޔުނައިޓެޑަށް ވަނީ ލިބިފަ އެވެ.

އިނގިރޭސިވިލާތުގެ އެހެން ބޮޑެތި ކްލަބްތަކަށް ބަލާއިރު، ލިވަޕޫލުން އަންނަނީ ޕީއެސްޖީގެ ފްރާންސް ވިންގަރު ބްރެޑްލީ ބާކޯލާ އަދި ސެނެގާލް ފޯވާޑް އިބްރާހިމް އެމްބާޔޭ ހޯދުމަށް 155 މިލިއަން ފައުންޑުގެ ބޮޑު އަގެއް ހުށަހެޅުމަށް ތައްޔާރުވަމުންނެވެ. އަދި ބަޔާން މިއުނިކުން އަންނަނީ ކޮންޓްރެކްޓްގެ ފަހު އަހަރު ހޭދަކުރަމުންދާ އިންގްލަންޑްގެ ކެޕްޓަން ހެރީ ކޭންއާއެކު އާ އެއްބަސްވުމަކަށް އާދެވޭނެކަމުގެ ފުރިހަމަ ޔަގީންކަން ދައްކަމުންނެވެ.

އެހެނިހެން މުހިންމު ނިންމުންތަކަށް ބަލާއިރު، ކޯމޯއިން ވަނީ ފިއޮރެންޓީނާގެ ފޯވާޑް މޮއިސް ކީން 25 މިލިއަން ފައުންޑުގެ ޕެކޭޖެއްގައި ހޯދަން ހުށަހަޅާފަ އެވެ. ލީޑްސް ޔުނައިޓެޑުން ވަނީ ވެސްޓްހޭމްގެ މެޑިކަލް ފުރިހަމަކުރުމަށް ޖޯއެލް ޕީރޯއަށް ހުއްދަ ދީފަ އެވެ. އަދި އޭސީ މިލާނުން 34 މިލިއަން ފައުންޑަށް ޑިއޭގޯ މޮރޭރާ ސޮއިކުރަން އެއްބަސްވެފައިވާއިރު، ހިލޭ ޓްރާންސްފާއެއްގައި ހުރި އުމުރުން 39 އަހަރުގެ ޖޭމީ ވާޑީ ހޯދުމަށް ސައޯ ޕޯލޯ އާއި ވެސްޓްހޭމްއިން އަންނަނީ ޝައުގުވެރިކަން ފާޅުކުރަމުންނެވެ.