ޕެނަލްޓީ އޭރިއާ ތެރޭގައި ހިފާދެމުމާއި ފައުލްކުރުން ހުއްޓުވަން ޕްރެމިއާ ލީގުން ވަރުގަދަ ފިޔަވަޅުތަކެއް އަޅަނީ

އިންގްލިޝް ޕްރެމިއާ ލީގުގެ ނިމިދިޔަ ސީޒަނުގައި ކޯނަރުތަކާއި ސެޓްޕީސްތައް ނަގާ ވަގުތު ޕެނަލްޓީ އޭރިއާ ތެރޭގައި ކުޅުންތެރިން އެކަކު އަނެކަކު ހިފާދެމުމާއި، ކޮއްޕުމާއި، އަދި ގޯނާކުރުން ވަނީ ވަރަށް ބޮޑަށް އިތުރުވެފަ އެވެ. ބީބީސީ ސްޕޯޓްސްގެ ރިޕޯޓެއްގައިވާ ގޮތުން، މި މައްސަލައަށް ހައްލެއް ހޯދުމަށް މެޗު އޮފިޝަލުންނާއި ރެފްރީން މިހާރު ވަނީ ވަރުގަދަ ފިޔަވަޅުތަކެއް އަޅަން ތައްޔާރުވެފަ އެވެ. އެވަޓަންގެ މެނޭޖަރު ޑޭވިޑް މޯޔެސް ފެބްރުއަރީ މަހު މެންޗެސްޓާ ޔުނައިޓެޑާ ދެކޮޅަށް ކުޅުނު މެޗަށްފަހު ވިދާޅުވެފައިވަނީ، "ރެފްރީން މިފަދަ ކަންކަމުގެ ތެރެއަށް ވަންނަން ބޭނުންނުވާކަމުގެ އިހުސާސް ކުރެވޭ" ކަމަށާއި މިކަމާ މެދު ފިޔަވަޅުު ނާޅާ އޮތުމަކީ ދެރަކަމެއް ކަމަށެވެ.

މި އާ ސީޒަން ފެށިގެންދާއިރު، ރެފްރީންނަށް ވަނީ ކުޅިވަރުގެ ރޫހާ ހިލާފަށް ހިންގާ މިފަދަ އަމަލުތަކަށް ސާބިތުކަމާއެކު އަދަބު ދިނުމަށް އިރުޝާދު ދީފައެވެ. ގަވާއިދުތަކަށް ބަދަލެއް ނާންނަ ނަމަވެސް، ކުޅުންތެރިޔާ ބޯޅައަށް ހުރަސްއެޅޭ ގޮތަށް ސީދާ ބޯޅައަށް ނުބަލައި، އިދިކޮޅު ކުޅުންތެރިޔާގެ ހަރަކާތްތައް ހުއްޓުވުމަށް ދެއަތުން ހިފެހެއްޓުމާއި، ހެދުމުގައި ހިފާދެމުން ފަދަ ކަންކަމަށް ރެފްރީން ހަރުކަށިވާނެ އެވެ. ވޭތުވެދިޔަ ސީޒަނުގައި ވީއޭއާރު (VAR) އިން އަޅާނުލާ ދޫކޮށްލި 20 ހާދިސާގެ ތެރެއިން ހަތަރުބައިކުޅައެއްބަޔަކީ ބޯޅައާ ނުކުޅެ ކުޅުންތެރިން ވައްޓާލުމުން ލިބެންޖެހޭ ޕެނަލްޓީތަކެވެ.

ރެފްރީންގެ އިސްވެރިޔާ ހާވަޑް ވެބް ވިދާޅުވީ، ރެފްރީންނަށް އިރުޝާދު ދީފައިވަނީ އިންޒާރު ދިނުން މަދުކޮށް، ސީދާ ފައުލް ދިނުމަށް އިސްކަންދިނުމަށެވެ. "އަހަރެމެން ބޭނުންވަނީ ރެފްރީން ފެންނަ ކަންކަމަށް ފިޔަވަޅު އަޅަން ކެރޭ ބަޔަކަށް އަދި ޔަގީންކަން ހުރި ބަޔަކަށް ވާން،" ވެބް ވިދާޅުވި އެވެ. އަދި ކުޅުންތެރިންގެ އަހުލާގަށް ބަދަލު އައިސްގެން މޫވްމަންޓް މަދުވި ނަމަވެސް، ރެފްރީން ގަވާއިދު ތަންފީޒުކުރުން ހުއްޓާނުލާނެ ކަމަށް އޭނާ ފާހަގަކުރެއްވި އެވެ.

ނަމަވެސް، މި އާ އުސޫލުތަކާ މެދު ކްލަބްތަކުގެ ކުޅުންތެރިންނާއި ކޯޗުންގެ މެދުގައި ހިޔާލުތަފާތުވުންތައް އެބަހުއްޓެވެ. ޕްރޯ ރެފް (Pro Ref) އިން ވަނީ ކްލަބްތަކަށް ޒިޔާރަތްކޮށް، ވޭތުވެދިޔަ ސީޒަނުގައި ފައުލްގެ ގޮތުގައި ނުބަލާ، ނަމަވެސް މި ސީޒަނުގައި ޕެނަލްޓީ ދޭނެ ހާދިސާތަކުގެ ވީޑިއޯ ކްލިޕްތައް ދައްކާފަ އެވެ. ބައެއް ކުޅުންތެރިން ދެކޭގޮތުގައި ކްރިސްޓަލް ޕެލަސްގެ މާކް ގޭހީއަށް ބޯންމަތުގެ ބަފޯޑޭ ޑިއާކިޓޭ ކުރި ފައުލަކީ އޭނާ އަމިއްލައަށް ހޯދި ފައުލެކެވެ. ނަމަވެސް އަނެއްބައި ކުޅުންތެރިން ގަބޫލުކުރަނީ އެއީ ސީދާ ހިފާދެމުމުގެ ފައުލެއް ކަމަށެވެ.

މި އާ ބަދަލުގެ ސަބަބުން ޓީމުތަކުގެ ސެޓްޕީސް އުކުޅުތަކަށް ބޮޑު އަސަރެއް ކުރާނެ ކަމަށް ބެލެވެ އެވެ. ނިމިދިޔަ ސީޒަނުގައި ޕްރެމިއާ ލީގުގައި ޖެހި ޖުމްލަ ގޯލުގެ %25.7 އަކީ ސެޓްޕީސްތަކުން ޖެހި ގޯލުތަކެވެ. މިއީ ވިލާތުގެ އެންމެ ބޮޑެތި ލީގުތަކާ އަޅާބަލާއިރު އެންމެ މަތީ އަދަދެވެ. މިސާލަކަށް، ވޯލްޑް ކަޕްގައި ހަރުކަށި އުސޫލުތަކެއް ބޭނުންކުރުމުގެ ސަބަބުން ސެޓްޕީސް ގޯލުތަކުގެ އިންސައްތަ އުޅުނީ %17.5 ގަ އެވެ.

އާސެނަލްއަކީ ނިމިދިޔަ ސީޒަނުގައި ސެޓްޕީސްތަކުން އެންމެ ގިނަ ގޯލު (25 ގޯލު) ޖެހި ޓީމެވެ. އަދި ބައިކޮޅަށް ސެޓްޕީސްއިން އެންމެ މަދު ގޯލު (7 ގޯލު) ވަނީ ވަދެފަ އެވެ. މެންޗެސްޓާ ޔުނައިޓެޑުން 21 ގޯލު އަދި ޓޮޓެންހަމްއިން 19 ގޯލު ސެޓްޕީސްއިން ކާމިޔާބުކުރި އެވެ. އަނެއްކޮޅުން، ސެޓްޕީސްތައް ދިފާއުކުރުމުގައި ނާކާމިޔާބުވި ލިވަޕޫލް (19 ގޯލު ބައިކޮޅަށް) އަދި ޗެލްސީއާއި ނިއުކާސަލް (17 ގޯލު ބައިކޮޅަށް) ފަދަ ޓީމުތަކަށް މި އާ އުސޫލުގެ ސަބަބުން ފައިދާތަކެއް ކުރާނެ ކަމަށް ބެލެވެ އެވެ.

މީގެ ކުރިންވެސް ސީޒަން ފެށޭއިރު ރެފްރީން ހަރުކަށިކޮށް ކަންކަން ތަންފީޒުކުރުމަށްފަހު، ދުވަސްކޮޅެއްފަހުން ކުރީގެ ހާލަތަށް ކަންކަން ރުޖޫއަވާކަމުގެ ޝަކުވާ ބޮޑެވެ. އެހެންކަމުން، މި އާ އުސޫލަކީ ހަމައެކަނި ސީޒަން ފެށޭ ދުވަސްކޮޅު އެކަނި ބޭނުންކުރާ އުސޫލަކަށް ނުހަދައި، މުޅި ސީޒަނުގައިވެސް ކޯނަރުތަކާއި ސެޓްޕީސްތަކުގެ ހަމަނުޖެހުންތައް ސާފުކޮށްދިނުމަކީ ރެފްރީންނަށް އޮތް އެންމެ ބޮޑު ގޮންޖެހުމެވެ.