އޮފީސްތަކުގެ ބަޖެޓް ބޭނުންކޮށްފައިވާގޮތުގެ ތަފްސީލް ހުށަހަޅަން އަންގައިފި
މި އަހަރު ސަރުކާރުގެ އޮފީސްތަކުގެ ބަޖެޓް ބޭނުންކޮށްފައިވާ ގޮތުގެ އަހަރީ ކޭޝްފްލޯ މި މަހުގެ 23ގެ ކުރީން ހުށަހެޅުމަށް ފިނޭންސް މިނިސްޓްރީން އަންގައިފި އެވެ.
ފިނޭންސް މިނިސްޓްރީން މިދިޔަ ހަފުތާ އޮފީސްތަކަށް ފޮނުވާފައިވާ ބަޖެޓާ ބެހޭ ސާކިއުލާގައި ބުނެފައި ވަނީ ދައުލަތުގެ އޮފީސްތަކަށް އަންނަ އަހަރަށްވާ ބަޖެޓު ދޫކުރެވޭނީ އެ އޮފީހެއްގެ ކޭޝްފްލޯގެ މައުލޫމާތު ލިބިގެން ކަމަށާއި އަންނަ އަހަރަށް ލަފާކުރާ ބަޖެޓު ޑިސްބާސްކުރާނީ ރައްޔިތުންގެ މަޖިލީހަށް ހުށަހަޅާ ބަޖެޓް ޑިސްބާސްމަންޓް ޕްލޭނާ އެއްގޮތަށް ކަމަށް އެ ސާކިއުލާގައި ބުނެފައިވެ އެވެ. އަދި މިނިސްޓްރީން އާންމުކުރި ސާކިއުލާގައި ވަނީ ކޭޝްފްލޯ ޕްލޭން ތައްޔާރުކުރާނެ ގައިޑްލައިންއެއް އާންމުކޮށްފަ އެވެ.
އެ ސާކިއުލާގައި ބުނެފައިވަނީ ދައުލަތުގެ ހަރަދަށް ޒިންމާވުމުގެ ގާނޫނުގައި ބަޔާންކުރާ ކޭޝްފްލޯ ޕްލޭން ތައްޔާރުކުރުމަށާއި ދައުލަތަށް ލިބޭ ފައިސާއިން ދައުލަތުން ކުރަން ޖެހޭ ހޭދަތައް ހަމަޖެއްސުމަށްޓަކައި ދައުލަތުގެ އެންމެހައި އޮފީސްތަކުން އެ އޮފީހަކަށް ލިބޭނެ ކަމަށް އަންދާޒާކުރާ އާމްދަނީއާއި ހިނގާނެ ކަމަށް ލަފާކުރާ ހަރަދުގެ ތަފްސީލު ކޮންމެ މަހެއް ވަކިން އެނގޭނެހެން ތައްޔާރުކުރަން ވާނެ ކަމަށެވެ.
