ހުއްދަ ނުހޯދާ ކެނޯއެއްގައި ކުޅުދުއްފުއްޓަށް އައި ދެ މީހަކު އަނެއްކާވެސް ހައްޔަރުކޮށްފި

ސިއްހީ ކުއްލި ނުރައްކަލުގެ ހާލަތު އިއުލާނުކޮށް، ކުޅުދުއްފުށީ ލޮކްޑައުންވެސް ކޮށްފައިވަނިކޮށް ހދ. ކުރިނބިން ފުރައިގެން ކުޅުދުއްފުއްޓައް ކެނޯ އެއްގައި އައި ދެ މީހަކު ހައްޔަރު ކޮށްފި ކަމަށް ފުލުހުން ހާމަކޮށްފި އެވެ.

ފުލުހުން މިއަދު ބުނީ އެ ދެ މީހުން ހައްޔަރުކުރީ ކުޅުދުއްފުށި އެއާޕޯޓު ސަރަހައްދުން ރޭ 23:30 ހާއިރު ކަމަށެވެ.

މި މައްސަލައާ ގުޅިގެން ހައްޔަރުކޮށްފައިވަނީ 28 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެއް ކަމަށެވެ. މި މައްސަލަ އަންނަނީ މިހާރު ތަހުގީގު ކުރަމުން އަންނަ ކަމަށް ފުލުހުން ބުނެއެވެ.

މީގެކުރިންވެސް ހދ.ނޮޅިވަރަމުން ފުރައިގެން ކުޅުދުއްފުއްޓަށް މިގޮތަށް އަރަން އުޅުނު ދެ މީހަކުވަނީ ހައްޔަރުކޮށްފައެވެ. މި ދެ މީހުންގެ ބަންދަށް ވަނީ 15 ދުވަސް ޖަހާފަ އެވެ.