ޑިސެމްބަރުމަހުގެ އިންކަމް ސަޕޯޓް އެލަވަންސަށް އެދުމުގެ ފުރުސަތު ހުޅުވާލައިފި

ކޯވިޑްގެ ސަބަބުން އާމްދަނީއަށް އަސަރުކޮށްފައިވާ ފަރާތްތަކަށް ސަރުކާރުންދޭ "އިންކަމް ސަޕޯޓް އެލަވަންސް"ގެ މިދިޔަ އަހަރުގެ ޑިސެމްބަރު މަހުގެ އިންކަމް ސަޕޯޓް އެލަވެންސަށް އެދި ހުށަހެޅުމުގެ ފުރުސަތު ހުޅުވާލައިފި އެވެ.

ޖޮބް ސެންޓަރުން ބުނީ ނިމުނު އަހަރުގެ ޑިސެމްބަރު މަހުގެ އިންކަމް ސަޕޯޓަށް ހުށަހެޅުމުގެ ފުރުސަތު މިމަހުގެ 31 ގެ ނިޔަލަށް ހުޅުވާލާފައިވާ ކަމަށެވެ.

ސަރުކާރުން އިންކަމް ސަޕޯޓް އެލަވަންސް ދެނީ ކޮވިޑާއި ގުޅިގެން ވަޒީފާ އަށް ނުރަނގަޅު އަސަރު ކޮށްފައިވާ ފަރާތްތަކާއި އަމިއްލަ މަސައްކަތްކުރާ ފަރާތްތަކުގެ ތެރެއިން ކޮވިޑާއި ގުޅިގެން އާމްދަނީ އަށް ނުރަނގަޅު އަސަރު ކޮށްފައިވާ ފަރާތްތަކަށެވެ.

އެގޮތުން ވަޒީފާ އިން ވަކިކޮށްފައިވާ މީހުން ނުވަތަ ސަސްޕެންޑްކޮށްފައިވާ މީހުންނާއި ނޯޕޭގައި ތިބި މީހުންނަށް 5،000ރުފިޔާ އެލަވެންސެއް ލިބޭނެ އެވެ. އަދި މުސާރަ އިން ބައެއް އުނިކޮށްފައިވާ މީހުންގެ ތެރެއިން 5،000ރުފިޔާ އަށްވުރެ ކުޑަ މުސާރައެއް ލިބޭ މީހުންނަށް 5،000 ރުފިޔާ އިން މިހާރު ލިބޭ އަދަދެއް އުނިކުރުމުން ޖެހޭ އަދަދު ލިބޭނެ އެވެ.

އިންކަމް ސަޕޯޓް އެލަވަންސް މިދިޔަ އަހަރުގެ މާޗު މަހުންފެށިގެން ދެމުންއަންނައިރު މިދިޔަ ޑިސެމްބަރުގެ ނިޔަލަށް އިންކަމް ސަޕޯޓުގެ ގޮތުގައި 221.1 މިލިއަން ރުފިޔާ ދޫކޮށްފައިވެ އެވެ.

އިންކަމް ސަޕޯޓް އެލަވެންސް ދޭ ފަރާތްތަކާއި އެކި ސަބަބުތަކާ ހުރެ އެޕްލިކޭޝަން ރިޖެކްޓު ކުރާ މީހުންގެ މައުލޫމާތު ޖޮބްސެންޓަރުގެ ވެބްސައިޓުން ބަލާލެވޭނެ އެވެ.