ކުޅުދުއްފުށި ސިޓީ ކައުންސިލްގެ މެޖޯރިޓީ އެމްޑީޕީއަށް

ކުޅުދުއްފުށި ސިޓީ ކައުންސިލް މެމްބަރުން ހޮވަން މިއަދު ކުރިއަށްގެންދިޔަ ތާރީހީ އިންތިހާބުގައި މި ސިޓީގެ ގިނަ ގޮނޑިތަކެއް އެމްޑީޕީން ނަގައިފި އެވެ.

މިދިޔަ އަހަރުތަކުގެވެސް ކުޅުދުއްފުށީ ކައުންސިލްގެ މެޖޯރިޓީ ނަގާފައިވަނީ އެމްޑީޕީންނެވެ. ގިނަ ގޮނޑިތައް އެމްޑީޕީން ނަގާފައިވާއިރު މެދު ދެކުނު ދާއިރާއަށް ވާދަކުރެއްވީ އެއްނަމެއް ކިޔުއްވާ ދެ އަންހެނުންނެވެ.

އެގޮތުން އެމްޑީޕީ ކެންޑިޑޭޓް އާތިފާ އަލީއަށް ލިބިލެއްވީ 309 ވޯޓެވެ. އޭނާއާ ވާދަކުރެއްވީ ޕީޕީއެމްގެ ކެންޑިޑޭޓް އާތިފާ އަލީ ލިބިލެއްވީ 231 ވޯޓެވެ.

މި ވޯޓްފޮއްޓަށް ވޯޓުލުމުގެ ހައްގު 954 މީހަކަށް ލިބިފައިވާއިރު ވޯޓްލީ ޖުމްލަ އަދަދަކީ 588 އެވެ.

އުތުރު ދާއިރާއަށް ތިން ކެންޑިޑޭޓަކު ވާދަކުރެއްވިއިރު އެ ގޮނޑިވެސް ކާމިޔާބުކުރެއްވީ އެމްޑީޕީގެ ކެންޑިޑޭޓް މުހައްމަދު ދާއޫދެވެ. އޭނާ އެ ދާއިރާ ނެގީ 386 ވޯޓުންނެވެ. އޭނާއާ އެންމެ ގާތުން ވާދަކުރެއްވީ ޕީޕީއެމްގެ ކެންޑިޑޭޓް އަސްރަފް އަބުދުﷲ އަށް ލިބިލެއްވީ 217 ވޯޓެވެ.

އަމިއްލަ ގޮތުން އެ ދާއިރާއަށް ކުރިމަތިލެއްވި އަލީ ޝުކޫރަށް ލިބިލެއްވީ 31 ވޯޓެވެ. މި ފޮއްޓަށް ވޯޓްލުމުގެ ހައްގު 958 މީހުންނަށް ލިބިފައިވީއިރު ޖުމްލަ އެ ފޮއްޓަށް ވޯޓްލީ 698 މީހުންނެވެ.

ހުޅަނގު ދެކުނު ދާއިރާގެ ގޮނޑި އެމްޑީޕީގެ ކެންޑިޑޭޓް ރިލްވާން މުހައްމަދު 266 ވޯޓުން ނެގިއިރު އޭނާއާ އެންމެ ވާދަކުރެއްވި ޕީޕީއެމްގެ ކެންޑިޑޭޓް މުހައްމަދު އަބުދުއްރައްޒާގަށް ލިބިލެއްވީ 186 ވޯޓެވެ.

އެ ދާއިރާއަށް ވޯޓްލުމުގެ ހައްގު 955 މީހުންނަށް ލިބިފައިވާއިރު ވޯޓްލާފައިވަނީ 665 މީހުންނެވެ. މީގެ އިތުރުން މޭޔަރުގެ ގޮނޑި އާއި އިރުދެކުނު ދާއިރާގެ ގޮނޑި އަދި ހުޅަނގު އުތުރު ދާއިރާގެ ގޮނޑިވެސް ކާމިޔާބުކޮށްފައިވަނީ އެމްޑީޕީންނެވެ.