ފާޅުބޯޓުން ފަހުން ނެގި ސާމްޕަލްތައް ނެގެޓިވް

ކުޅުދުއްފުއްޓާއި މާލެއާ ދެމެދު ދަތުރުކުރާ ފާޅުބޯޓުގެ ފަޅުވެރިޔަކު ކޮވިޑް-19 އަށް ޕޮޒިޓިވްވުމާ ގުޅިގެން އެ ބޯޓުން ނެގި އިތުރު ސާމްޕަލްތައް ނެގެޓިވްވެއްޖެ އެވެ.

ފާޅުބޯޓުގެ ފަޅުވެރިޔަކު ޓެސްޓްކުރީ މިމަހުގެ ދެވަނަ ދުވަހު ކުޅުދުއްފުށިން ޕޮޒިޓިވްވި ކޭސްތަކާ ގުޅިގެންނެވެ. އެހެންވެ މާލެ އައިތަނުން ފަޅުވެރިންނާއެކު ބޯޓު ކަރަންޓީނުކޮށް، ޕޮޒިޓިވްވި މީހާ އެކަހެރިކުރި އެވެ.

ކުޅުދުއްފުށީ ރީޖަނަލް ހޮސްޕިޓަލްގެ މެނޭޖަރު އަހުމަދު ދާއޫދު ވިދާޅުވީ، ޕޮޒިޓިވްވި ކޭސްއާ ގުޅިގެން ފަހުން، ފާޅުބޯޓުން ނެގި ހުރިހާ ސާމްޕަލެއް ނެގެޓިވްވެފައިވާ ކަމަށާ އެހެންނަމަވެސް ފަޅުވެރިން 14 ދުވަހުގެ ކަރަންޓީނު މުއްދަތު ފުރިހަމަކުރާނެ ކަމަށެވެ.

އެ ބޯޓު މީހަކު ޕޮޒިޓިވްވުމާ ގުޅިގެން ކުޅުދުއްފުށިން އެންމެ ފަހުން ފެނުނު ކޮވިޑްގެ 3 ކޭސް ފާޅުބޯޓާ ގުޅުން ހުރިކަމަށްވަނީ ބެލެވިފަ އެވެ. އެއިރު ފާޅުބޯޓުގެ ފަޅުވެރިޔާގެ ސާމްޕަލް ނެގުން ލަސްވީ ބޯޓް އެވަގުތު މާލޭގައި އޮތުމުންނެވެ. ރަށުން 3 މީހުން ބައްޔަށް ޕޮޒިޓިވްވެފައިވަނީވެސް ބޯޓު މާލޭގައި އޮއްވަ އެވެ.

ފާޅުބޯޓުން ޕޮޒިޓިވްވި މީހައާ އޭނާގެ އަންހެނުންގެ އިތުރުން އާއިލާގެ ދެ މެމްބަރަކު ވަނީ ކޮވިޑަށް ޕޮޒިޓިވްވެފަ އެވެ. އެ މީހުން ދަނީ ކަރަންޓީނު ފުރިހަމަކުރަމުންނެވެ.