މުދަލު ޒަކާތުގެ ނިޞާބު ބޮޑުކޮށްފި

މުދަލު ޒަކާތުގެ ގޮތުގައި ދައްކަންޖެހޭ ނިޞާބުގެ ދިވެހި ރުފިޔާގެ މިންވަރު އިސްލާމިކް މިނިސްޓްރީން އިއްޔެ ބޮޑުކޮށްފިއެވެ.

އިސްލާމިކް މިނިސްޓްރީން ބުނީ، މިހާރު މުދަލު ޒަކާތް ވާޖިބުވާ ނިޞާބުގެ ދިވެހި ރުފިޔާއިން ދައްކަން ޖެހޭ މިންވަރަކީ 7،312.55 ރުފިޔާއެވެ. އެއީ 249.9 ރުފިޔާގެ އިތުރުވުމެކެވެ. މިދިޔަ ޖެނުއަރީ މަހު ކަނޑައަޅާފައިވާ މުދަލު ޒަކާތުގެ ނިޞާބު ހަމަވާ ދިވެހި ރުފިޔާގެ މިންވަރަކީ، 7062.65 ރުފިޔާއެވެ.

30 އެޕްރީލް 2023 އިން ފެށިގެން ފައިސާއިން މުދަލު ޒަކާތް ނެރުން ވާޖިބުވާ ނިޞާބަކީ 7312.55 (ހަތްހާސް ތިންސަތޭކަ ބާރަ ރުފިޔާ ފަންސާސް ފަސްލާރި) pic.twitter.com/olW28FTDdt

— Ministry of Islamic Affairs (@MVIaffairs) May 2, 2023

ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. އެހެންވެ ރިހީގެ އަގަށް ބަދަލު އައުމުން ނިޞާބަށް ވެސް ބަދަލު އާދެއެވެ.

މުދަލު ޒަކާތަކީ ތިމާގެ މުދަލުގެ ނިސާބު ހަމަވެ ހިޖުރީ ސަނަަތުން އަހަރު ހަމަވާ އިރު ތިމާގެ ފުރިހަމަ މިލްކުގައި އެ މުދާ ހުރެއްޖެނަމަ އޭގެ 40 ބައިކުޅަ އެއްބައި ނެރެން ޖެހޭ ޒަކާތެވެ.

"މުދަލު ޒަކާތަކީ އިސްލާމް ދީނުގެ ރުކުނަކަށް ވީ ހިނދު އެ މީހެއްގެ މިލްކިއްޔާތުގައި ނިސާބު ހަމަވާ ވަރަށް ފައިސާ ހުރެ، އެ ފައިސާ ހުންނަތާ ހިޖުރީ އެއް އަހަރުވުމުން ޝަރުއީ ހަމަތަކާ އެއްގޮތަށް އޭގެ 40 ބައިކުޅަ އެއްބައި (2.5 ޕަސެންޓް) ނެރުމަށް ނަސޭހަތްތެރި ވަމެވެ." އިސްލާމިކް މިނިސްޓްރީން ނެރުނު ބަޔާނެއްގައި ބުނެފައި ވެއެވެ.

ރާއްޖޭގައި ފިތުރު ޒަކާތް ދައްކާ މީހުންގެ އަދަދު ގިނަ ނަމަވެސް މުދަލު ޒަކާތް ދައްކާ މީހުންގެ އަދަދު ދަށެވެ. މިިދިޔަ އަހަރު މުދަލު ޒަކާތުގެ ގޮތުގައި ލިބުނީ 91 މިލިއަން ރުފިޔާ އެވެ.

މީރާގެ ވެބްސައިޓާއި އެޕްލިކޭޝަން މެދުވެރިކޮށް މިހާރު މުދަލު ޒަކާތް ދެއްކޭނެއެވެ.